Biolla Blida

وصفة بيولا للتبييض الفوري ‼️🆘
ارواحي نمدلك وصفة بشرتك تبياض تولي تشعلي 🥰 شفتي كيفاش حبستي كامل شغلك و بديتي تقراي ؟ 🙂اي وحدة بغات تنجح وتطلع بيها فمجال التجميل تضغط عليكم بكلمة وحدة التبييض كريم تبييض سيروم تبييض صابون التبييض راكم راح تهبلو 🙂
جيت نطيح عليهم الصوڨ الحقيقة انو مكاش حاجة تبيض واذا كاينة عندها اثار جانبية يالوكان عالمدى البعيد
كي نقولولك كاين سيروم يفتح مشي معنتها نتي بشرتك درجتها 4 راح يردهالك 1 مستحيل بصك لون البشرة راه فالجينات تعك كاين طريقة نفتحو لون البشرة تعك و نردوها شويا منورة بتحفيز الجلوتاثيون طبيعيا راني هدرت عليها مقبل الطريقة فمنشور سابق فالصفحة
الطريقة الغير طبيعية هي كريمات الهيدروكينوين لي يعتبر خطر كبير بدون وصفة ومسبب للسرطان
و الثانية هي حقن الجلوتاثيون لي يديروها المشاهير لي راكم متأثرين بيهم و هذي الحقن عندها اثار جانبية عالكلى و الكبد يهردوهم مع تكرار الحقن بصك الحقنة مفعولها مؤقت لازم تقعدي ديري فيها اضافة انو ماشي كامل الناس تخرج عليهم وهذ المشاهير قبل ميديرو هذ الحقن راهم يجوزو على بزاف تحاليل طبية باش يقدرو يديروها و لازم يبقاو يديرو فيهم باش يعسو الكلى و الكبد تعهم خسارة دراهم و جهد و مغامرة.
نصيحتي ليكم لي عندها تصبغات اولا حوسي على سبب التصبغات هذو خاصة تع الجسم ماشي تحوسي تبيضيهم لانو السبب اذا كان داخلي ديري النظاف يقعدو متصبغين اذا الدعوة هانية ومعندك والو لداخل نستعملو السيرومات والكريمات تع التقشير و التفتيح و ممكن فالحالات العنيدة نديرو تقشير كيميائي فالبلايص لي فيهم تصبغ .
بالنسبة لي راهم يسقسوني فلانة كانت سمرا كيفاش بياضت وتبدلت هي اصلا لونها الاصلي مكانش اسمر برك تبدل المحيط تعها و تبدلو بزاف عوامل باش رجعت لاصلها كيما التعرض للشمس ، نوعية الاكل، المناخ ، الهرمونات الخ حتى لي يسافرو لبلد اخر يتبدل لونهم يعني راهي طبيعية وهذاك هو اللون المكتوب في جيناتها كان مخبي برك لانو الجسم كي يشوفك تخدمي تحت الشمس ولا عندك ستراس و لا هرمونات يتقلبو و ماكلتك ماشي مليحة يدخل فحالة الدفاع و يزيد صبغة الميلانين باش يحميك و هكا تولي بشرتك اغمق حاولي برك ديري كيفها حبسو برك هذ الهوس التصبغات حاجة طبيعية تتعالج و السمار تع الجسم ممكن يتفتح و لي لونها الاصلي أسمر اتقبلي روحك البشرة السمراء جميلة 💜 اذا متقبلتيهاش وحابة تهلكي روحك راه عندك مشكل اكبر من السمار تلقاي دواه عند مختص نفسي 😊🙏
اذكر المصدر بحالة اعادة النشر
تابعيني للمزيد من نصائح بيولا

ماهي اخر الابداعات و الترندات لي سمعتو بيها للبشرة علقو نعطيكم الجواب اذا الترند صح ✅ او خطأ 🙅
بيولا ☘️

ما هو أحسن مرطب للبشرة الدهنية 🤔
نعم سيدتي اذا عندك بشرك دهنية و تتزيت مشي معنتها متسحقش مرطب العكس راهو مالأساسيات بصح المشكل تعكم انو مراكمش تلقاو مرطب يناسبكم بصك المرطبات يا يسدولكم المسام يديرولكم الحب ووجهكم يولي يعرق ويزيت كثر يا يديرولكم حساسية
عندي ليكم 3 نصائح فهذ الحالة اول نصيحة حبسو الكريمات هذوك تع خمسينالف لي راكم طلصوهم فوجهكم ولي يسدو المسام اذا معندكش رطبي بماء الورد أرحم منو ماشي تستعمليه مبعد تولي بالحبوب و تجري عند الطبيب تخلاص عليك بفيزيتا تع 300 الف و دووات سما صارفة صارفة مليون فالتراتمون .
ثانيا انا ننصح اي وحدة بشرتها دهنية استعملي المنتجات الكورية بدون تردد ، علاش؟ الشعب الكوري معروف انو الاغلبية الساحقة بشرتهم دهنية وحساسة و شعرهم ثاني دهني بزااف على هذي ابتكرو وطورو منتجات للبشرة الدهنية كثرمن غيرها هذ المنتجات الحاجة لي تميزهم انو البشرة تمتصهم بالخف + ميسدوش المسام بصك خفاف بزاف و ميديروش حساسية بصح متروحيش تبعيلي المنتجات لي راهم يدورو فالتيكتوك و توريهملك المؤثرة فلانة تبعي بيولا برك هي تمدلك الصحيح وواش صح راهو فعال راني حطيتلكم التصاور تعهم كامل لي راهم لتحت هذو قلب الحبة شوفي السعر فالصورة تفهمي المنتج الفعال جامي يكون رخيس هذي حقيقة لا مفر منها يعني من 300 و طلع هذاك هو .
اذا معندكش ميزانية تع 300 و طلع باش تشري هذو عندك البديل تقدري تستعملي سيروم الهيالورونيك راني موفرتهولكم بجودة و مكونات مالخارج ماشي محلية يعني قلب الحبة جبتهولك لعندك يدير 200 الف عندي فالصفحة اما اذا تحوسي اقل من هك استعملي ماء الورد ختي استعمليه و مديريش ليكرام تع عشرالاف هذوك ارحمي وجهك راه يستاهل تعامليه كيما الكريستالة تخسري عليه كريم شباب خيرمن تستعملي منتج رخيص و تعشي تجري من طبيب لطبيب .راني نهدر لانو جاوني بزاف حالات وجهم مساكن تشوه بالحبوب و ليطراص من ليكرام هذو بدون مانذكر الماركات المهم حذاري انتي تستاهلي الافضل استعملي الافضل 🤌
اذكر المصدر بحالة اعادة النشر
تابعيني للمزيد من نصائح بيولا☘️

بيولا تعاونك تبداي مشروعك ب200 الف برك ☘️👌 فبلاصة لي راكي قاعدة سجلي فدورة صناعة الصابون الطبيعي لي هي عبارة عن كورس أونلاين عبر الواتساب تتعلمي فيها الطريقة العلمية الصحيحة و أسرار صناعة الصابون باش يخرجلك ناجح 100% و تقدري تصنعي عدة أنواع و ديري الماركة تعك باش تبيعي منها
الدورة راح تكون محاورها كالتالي:
- اجراءات السلامة لصناعة الصابون الطبيعي
-صابون زيت الزيتون
- صابون حليب الماعز
-صابون حبة البركة
-الصابون المغربي( البلدي)
-صابون اللوز و العسل
-صابون الغار
-صابون الكركم و زيت شجرة الشاي
وهذو أشهر انواع الصوابين واكثرها طلبا فالسوق الجزائري و تتحصلي على شهادة مشاركة من الصفحة تع بيولا و أهم حاجة انو الدورة تبقى عندك تقدري تحضري الدروس وقت لي تحبي و ترجعي ليهم فأي وقت و اي استفسار بيولا ترافقك اثناء الدورة .للتسجيل تواصلو معايا خاص عبر ارسال الاسم و اللقب .اغتنمي الفرصة متخليش الصيف يروح دون انجاز 👌
بيولا☘️

شفت وحد الترند تع صوري منتجات السكين كير تعك انصدمت بنات يحطو فوق 10 منتجات فالبشرة
ياك قلنا 5 maximum للوجه متتحمسوش !🤌
بيولا☘️

سر من أسرار علم الاعصاب يفيد بشرتك و صحتك ☘️
كاين بنات و نساء للاسف عندهم مشاكل عائلية او نفسية ولا محيطهم بشكل عام ماشي مليح و كاين لي هي بحد ذاتها شخص سلبي و تأوفرثينكي بزاف هذ النوعيات للاسف جسمهم دوما في حالة تأهب و دفاع ميريحش و الكورتيزول لي هو هرمون القلق طالع فالسما و كلما طلع كلما زادو مشاكل البشرة و الشعر يولي يطيح الخ .
ضرك نمدلكم طريقة تخففو مالافكار السلبية وهذ الطريقة ميعرفوهاش بزاف الناس ماعدى قلة و يعتمدوها معظم اطباء الاعصاب فالعالم .
كامل تعرفو بلي الفايسبوك و مواقع التواصل عندهم خوارزمية يعني مثلا نتي تحبي تشوفي فيديوات تع الطبخ الفايسبوك يولي يخرجلك غير فيديوات تع الطبخ لانو الخوارزمية شافتك بلي راكي طولي وتتفرجي فهذاك النوع بزاف تروح هي تصنفها على انها" مهمة " و تبدا تخرجلك غير فصوالح يشبهولها نفس الشي الدماغ تعنا كي تفكري فحاجة سلبية او مشكل صرا معاك وقت طويل ( اكثر من دقيقة) الدماغ هنا يصنفو على انو مهم و لازم نخرجلها بزاف افكار كيما هذ الفكرة و لي تشبهلها و هنا يجوك الافكار السلبية وحدة مور ختها و يتعفن مخك مثال شفتو حاليا راهو يدور فمواقع التواصل : " منجحتش فمسابقة الاساتذة ( فكرة 1) ...انا فاشلة ( فكرة 2) ...منين نجيب دراهم (فكرة 3) ...زهري ديما هك (فكرة 4) لوكان غير مخيرتش هذيك الحاجة (فكرة 5)شوفي التسلسل هذا مخك هو لي مدهولك بصك مديتيلو الفكرة اللولة و هو يبدا يدير سيناريوات عليها
الحل انو كلما تنوضي صباح غمضي عينيك و فكري ففكرة ايجابية مدة دقيقة مثلا " اليوم راح نطيب ماكلة نحبها بزاف غير ليا " مبعد حلي عينيك و مور عشر دقايق زيدي خمي ففكرة ايجابية جديدة على روحك" صح عندي تجاعيد خفاف بصح لون عينيا يهبل " ديري كيما هك 3 جولات و الاهم تخيري فكرة مقتنعة بيها هنا راكي طلعتي مستوى الدوبامين فالمخ و يولي يصنف هذ الافكار الايجابية انو مهمين و الباقي غير مهم و يولي وحدو يخرجلك الافكار الايجابية وشوفي كيفاش نهارك يجوز بعدها حتى لو صراولك مشاكل مراحش يصنفهم كحاجة مهمة بهذ الطريقة مستوى الكورتيزول يهبط ينقصلك الستراس و جسمك يخرج من وضعية الدفاع و يتلها بالبشرة و تجديد خلاياها و بشعرك وصحتك بشكل عام جربوها و ادعولي 🙏💜
اذكر المصدر بحالة اعادة النشر
تابعيني للمزيد من نصائح بيولا☘️

علبالكم بلي معظم مشاكل البشرة العنيدة خاصة الحبوب و التجاعيد سببها نفسيتك ؟ تفاعلو نعطيكم سر تفادي هذ الحالة
بيولا☘️

وصفة فطور الصباح الذي يعتمده خبراء التجميل و الرياضيين المحترفين ضروري تقراو الكابشن هذي قبل ماديروها👎
دايمن نقوللكم انو المكملات الغذائية متعوضش الاكل الطبيعي و بزاف يشكولي منقدروش ناكلو اكل صحي بصك غالي راني جبتلكم وصفة تكلفكم 100 الف فالاسبوع متقولوليش غالية 🙂 في بلاصة لي تاكلي المكملات الغذائية لي راهي اسعارهم في ارتفاع و تشري اكل صحي نهار واحد و عشرة لالا تبعيني هذي تاكليها كل يوم و فيها غاع واش تسحقي يعني جبتلك كامل وش يسحق جسمك باش تولي عندك الطاقة وتروحلك لانيمي و الفشلة و ترفدي صحتك و بشرتك و شعرك يتعافاو و ولادك لي ميحبوش الحليب يستنفعو بيها بصك تستهدف خلايا الدماغ و تحسنلهم الذاكرة.
الشوفان فيه كربوهيدرات معقدة + الياف هذو يشبعو و يديرو الطاقة
الياغورت الطبيعي فيه بروتين عنصر أساسي لصيانة العضلات
الدهون الصحية لي راهم فاللوز ، الكاجو، زريعة الكتان، الجلجلان، وبذور اليقطين. هذ الدهون ضرورية جداً لصحة الدماغ، الخلايا، وامتصاص الفيتامينات لي يذوبو فالدهون ملاح بزاف لترطيب جسمك مالداخل وبشرتك و شعرك و يحاربو الكولسترول الضار 👌
الحديد ومضادات الأكسدة راهم فالزبيب الأسود ودبس التمر تعالجلك فقر الدم (الأنيميا) ومتخليهش يرجع يحكمك و يحاربو الجذور الحرة المسؤولة عن الشيخوخة
المغنسيوم والزنك راهم معمرين فبذور اليقطين والمكسرات وهوما معادن مهمة لدعم المناعة الجهاز العصبي والاسترخاء العضلي.نحطلكم الاسعار تع المكونات فاول تعليق
ملاحظة مهمة : قبل ما تتناولو هذ الوصفة صباحا اشربو كاس ما كبير لانو الشوفان فيه الياف و الالياف تحب الما
و لي عندهم امراض الغدة الدرقية ويشربو الدوا تعهم افصلو بينو و بين الوصفة بحوالي ساعة متلاقوهمش باش ميصراش عائق فالامتصاص تعو
مرضى السيلياك الوصفة آمنة ليكم بصح اختارو الشوفان لي يكون مكتوب عليه ( خالي من الغلوتين لانو الشوفان يتخلط مع القمح فالمطاحن اذا ملقيتوش نحو الشوفان)
مرضى السكري و مقاومة الانسولين انتبهو فكميات الزبيب و دبس التمر متكثروش
لي جربتها تصور فالتعليقات راني نسنا نشوف اذا راكم طبقو 🙃 بارطاجيو المنشور على اوسع نطاق حبيباتي
اذكر المصدر بحالة اعادة النشر
تابعيني للمزيد من نصائح بيولا ☘️

راني رح نحطلكم وصفة تع فطور الصباح لي يعتمدوه خبراء التجميل
المحترفين والرياضيين
لي حابة دير glow up
تفاعلي 🙂☘️

علاش تبان ريحة كريهة في الإبط بعد إزالة الشعر بالليزر؟🤔
كاين بنات يلاحظو بلي بعد جلسات الليزر حتى لو فاتت أيام أو أسابيع طويلة تظهر ريحة مشي مليحة في الإبطين ويقولو الليزر دارلنا هكذا كخبيرة تجميل راح نوضحلكم هذ الموضوع.
حنا فالجلد تعنا عندنا شعر + + بكتيريا ضارة (مسؤولة عالريحة الكريهة) + بكتيريا نافعة ( تقتل البكتيريا الضارة ) هذو البكتيريا عايشين مع بعض فتوازن حنا كي نديرو الليزر باش نحيو الشعر راح نقتلو فطريقنا البكتيريا النافعة لي هي تحارب البكتيريا الضارة يعني وش يصرا ؟ البكتيريا الضارة تزيد و الريحة تولي تعبق .
السبب الزاوج انو الشعر كي كان موجود كان يساعد فتبخر العرق كي تنحوه مالبصيلة العرق راح يقعد فوق الجلد و يتفاعل مع البكتيريا و يدير الريحة
السبب الثالث انو الليزر يخدم بالحرارة يحرق البصيلة و الغدد العرقية كي تحس بهذيك السخانة تتحمس و تحسب بلي الدعوة لاهبة تروح تفرز عرق كثر والعرق + بكتيريا يمدلنا الريحة .
علبالي ضك كامل تخوفتو بصح نطمنكم انو موضوع الريحة هذا ماشي حتمي يعني مايصراش لڨاع الناس و مهيش مصنفة كعرض جانبي لليزر اقلية تصرالهم خاصة لي عندهم فرط تعرق و لا جلد حساس بزاف بصح الاغلبية صابو الريحة عادية و تحسنت المنطقة من ناحية النظافة وحتى لو ظهرت الريحا راح تروح مع الوقت كي الجسم يتكيف مع الوسط الجديد و يرجع التوازن لازم برك تعرفو كيفاش تستعلمو المنتجات باش تحافظو على هذيك البلاصة و تعاونوها باش ميتكاثروش فيها ليباكتيري اغسلوها بصابون ديرماسوفر البسو ملابس قطنية لارج ملازمش يصرا احتكاك باش ميجيكمش اسوداد و استعملو مضاد تعرق طبي .
اذكر المصدر بحالة اعادة النشر
تابعيني للمزيد من نصائح بيولا ☘️
#الجزائر